0

کلمہ طیبہ کے بعد نماز دین اسلام کا اول اور اہم ترین فرض ہے اورحدیث پاک کے مطابق نماز دین کا ستون ہے۔ ہر بندہ مؤمن پر یہ فرض ہے کہ وہ نماز سے متعلق تمام مسائل کے بارے میں آگاہی حاصل کرے۔ اس سلسلے میں یہ کتاب "نماز کے احکام" اپنے موضوع پر ایک بہترین اور جامع کتاب ہے۔ اس کتاب میں نماز اور نماز سے متعلقہ تمام موضوعات کا احاطہ نہایت ہی احسن انداز میں کیا گیا ہے۔ یہ کتاب در حقیقت امیر اہلسنت دامت برکاتہم العالیہ کے چند رسائل کا مجموعہ ہے۔ پہلے رسالے میں طہارت اور اس سے متعلقہ تمام امور بالخصوص وضو اور غسل کو تفصیل سے بیان کیا گیا ہے۔ نیز وضو کے بارے میں سائنسی تحقیق بھی بیان کی گئی ہے۔ اگلا رسالہ اذان اور اس کے فضائل و احکام پر مشتمل ہے۔ اس کے بعد نماز کا تفصیلی بیان ہے۔ نماز کی شرائط، فرائض، واجبات، مکروہات اور نما ز کا عملی طریقہ نیز نماز کی مختلف اقسام جیسے مسافر کی نماز، جنازہ، جمعہ، عیدین اور قضا نماز وں کا بھی تفصیلی بیان ہے ۔ اس کتاب کے ذریعے نماز کی باریک سے باریک غلطیوں کی بھی اصلاح ہوجاتی ہے۔اس کتاب کے آخر میں مدنی وصیت نامہ اور فاتحہ کا طریقہ بھی شامل ہے جس سے ایصال ثواب کا صحیح طریقہ بھی معلوم ہوتا ہے۔ نمازوں کو درست طریقے سے ادا کرنے کے لیے اس کتاب کا مطالعہ ہر مسلمان کے لیے بے حد ضروری ہے۔